【100毛 X 荼毒室】幾分瘋癲,幾分黐

誠邀您加入我們的Patreon計劃,成為會員後登入網站即享免廣告及專屬內容![可按此]

Spread the love

毛︰「有無畀人話過係黐線佬?」

好青年荼毒室︰「你會唔會對住個真嘅黐線佬話佢黐線?」

估唔到訪問一開始,毛毛就已經討論「黐線」討論到黐黐地。究竟讀哲學嘅係咪黐線佬?佢哋又有幾黐線先?

若這一刻我竟嚴重痴呆

  「我细细個參加完喪禮,覺得自己就死,我不斷諗死咗會去邊,諗到發燒。去到大學又晚晚嘔,搭巴士見到老人家,好驚下一秒就係佢哋。」原來黐線咁簡單,呢位室友直頭係同個世界黐住咗,所以比一般人對世界有反應,對生命有反思。「喲人成日話哲學離地,其實哲學問題好影響我嘅想法,係非常貼地就真。」

我有病還是你

  哲學好比一張藥方,藥方寫嘅唔係病因,而係治療嘅方法。「唔好有錯誤期待,哲學並不解決問題,亦無法提供答案,但就可以令你同件事分開,睇開啲,例如抽離地去諗死亡。」或者讀哲學嘅人就係一個長期病患者,病徵係熱愛思考,熱愛討論,而且對社會嘅毛病特別敏感。

要決心忘記,我便記不起?

  咩情況下你哋會放棄哲學?一問呢條問題,一眾室友十足十古時嘅將軍,衝晒出嚟護主。「就好似你唔會唔記得點游水你最多會游得慢,但用哲學嚟睇嘢嘅方式已經內化咗。」哲學已經深入佢哋嘅骨髓,只要用心,人人都係食神,只要用腦,人人都係哲學家。

喺香港做哲學佬,唔一定都係神經病嘅

  哲學家都係人,都要食飯。問佢哋有冇正職,佢哋話自己「Major in thinking,思考就係正職。」其實毛毛都 major in eating,仲係24小時 on call 㖭。咁你哋仲有咩理想呀?「我哋都想上市,會唔會考慮收購我哋?我哋都有雙學士學位,都有人牛津畢業,可以砌個『哲』字出嚟。」

最緊要政治

  歷代好多哲學家都係政治家,有冇諗過從政?有人曾經喺雨傘革命期間,高呼 Why not?This is our home!「我試過嗌『可恥』,嗌到警察腳軟」而當中有一位,竟然做過非建制派嘅立法會議員助理,想當年黃之鋒仲讀緊小學咋。

不要怕,只是術語調整

  黐線佬唔怕抗爭,唔怕醫生,但最怕就係賣弄術語,懶高深嘅人。所以佢哋句口號「嚴打學棍,杜絕文青」,就係直指呢類扮曬嘢嘅人,同時亦想話畀世人知,哲學係可以睇得明。想加入黐線佬嘅世界?其實唔難!

四台聯頒書籍

  咁難得約到12位哲學佬(遺憾有一位缺席),毛毛臨走前梗係把握機會,強行叫一眾室友推薦5本書,袋錢入你哋袋啦!

特別鳴謝︰瘋鳥 Hummingbird Coffee & Food 提供場地

原文刊登於8月17日第229期《100毛》雜誌